Saturday, October 08, 2011

ഉമ്മ

(ഒന്ന്)
ഓര്‍മ്മകളുടെ നദി നിറഞ്ഞൊഴുകിയാല്‍
ആദ്യമെത്തുക
മുലപ്പാലിന്റെ മണവും രുചിയുമാവും...
സ്‌കൂളുവിട്ടെത്തിയാലും
മുല കുടിക്കുമായിരുന്നുവെന്ന് ഉമ്മ പറയും...
ഒന്ന് ചുണ്ടിലും മറ്റൊന്ന് കൈയ്യിലുമായി
മടിയില്‍ കിടക്കുമ്പോഴാവണം
ലോകം ഇത്ര മധുരമാണെന്ന്
ആരും ആദ്യമറിഞ്ഞിട്ടുണ്ടാവുക..,
ആ മധുരത്തില്‍ നിന്നാണ്
ജീവിതത്തിന്റെ അരുചികളിലേക്ക്
പലരും നടന്നുപോയിട്ടുണ്ടാവുക...
തിരുത്താനാവാതെ
തിരിഞ്ഞുനടക്കാനാവാതെ
ആഴ്ന്നിറങ്ങുന്ന അപരാധങ്ങളുടെ
ചങ്ങലകളില്‍പ്പെട്ട്,
അഴികള്‍ക്കുമപ്പുറത്തെ വെളിച്ചത്തെ
സ്വപ്നം കാണുന്ന ഒരുവനാണ് പറഞ്ഞത്...
''ജീവന്‍ നല്‍കിയവളുടെ
ജീവിതമെടുത്തപ്പോഴും
എന്റെ വിരലുകള്‍ വിറച്ചിരുന്നില്ല...
പിച്ച വെക്കുമ്പോള്‍ മുതല്‍
ധൈര്യം തരാരുള്ളത് ഉമ്മയായിരുന്നു...''


(രണ്ട്)
ഗ്രീഷ്മത്തിലും നിന്റെ ചുണ്ടിനെന്നും
മരണത്തിന്റെ മരവിപ്പായിരുന്നു...
വിയര്‍ക്കുമ്പോഴെല്ലാം
നിന്റെ ചുണ്ടുകളുടെ നനവിലേക്ക്
ഊര്‍ന്നിറങ്ങാന്‍ അതാണെന്നുമൊരു വെമ്പല്‍...
ആയിരം സൂര്യാഘാതങ്ങള്‍
ഒരുമിച്ചേറ്റ നിന്റെ മുഖത്തെ
കരിഞ്ഞ ചുണ്ടുകളില്‍ മുഖം ചേര്‍ത്തുവെച്ച്
വിതുമ്പുമ്പോഴും
ഞാനറിയുന്നുണ്ടായിരുന്നു;
്‌നിന്നിലെ പ്രകൃതിയുടെ തണുപ്പ്...

Monday, October 03, 2011

സൈബര്‍രതി

നിരോഷയാണ് ആദ്യമിത് പറഞ്ഞത്...
നിന്റെ കവിതകളില്‍ പ്രണയത്തെക്കാള്‍ കൂടുതല്‍
മദ്യത്തിന്റെ ഗന്ധമാണെന്ന്...
ലോട്ടസ് ഗന്ധമുള്ള അത്തറുകളെ പിന്തള്ളി
ചോരനിറമുള്ള അക്ഷരങ്ങളില്‍
മുഖം പൂഴ്ത്തി രാത്രിയെ
ശ്വസിക്കാറുണ്ടെന്ന്...
സാറയുടെ പുറകെ
പ്രണയവുമായലഞ്ഞ
കോളറിഡ്ജിനെ പോലെ
ഒടുവില്‍, കറുപ്പിനെക്കാള്‍
ഭീകരമായി മദ്യം മറിഞ്ഞ്
നിന്റെ അക്ഷരങ്ങളില്‍
മഷി പടര്‍ന്ന് ജീവിതം വികൃതമാവുമെന്ന്...
ഒരു പകലില്‍
അഴുക്കുപുരണ്ട മുറിയില്‍
തൃഷ്ണയുടെ മറുകര തേടിയലഞ്ഞപ്പോള്‍
അവള്‍ പറഞ്ഞിരുന്നു...
പരസ്പരമോര്‍ക്കാന്‍
നഗ്നതയാണേറ്റവും നല്ലതെന്ന്...
എന്നിട്ടും മറവിയുടെ മറുകരയിലാണ്ടാണ്ട്
ഞാന്‍ പരിചയപ്പെടുത്തിയവന്റെ
വധുവേഷമാടാനണിയറയില്‍
അവള്‍ ഒരുങ്ങുന്നു...
ആടകളിലാര്‍ത്തിപൂണ്ടവന്‍ കാത്തിരിക്കുന്നു...
സൈബര്‍മുഖം പൂണ്ട രതി
ഇന്റര്‍നെറ്റ് കഫേകളിലെ അര്‍ദ്ധാന്ധകാരത്തില്‍
അടപ്പുതുറന്ന് പുറത്തുചാടുന്ന പ്രണയത്തെ
വിഷത്തില്‍ മുക്കി അവള്‍ക്ക് നീട്ടുന്നു...
ജീവന്റെ തുടിതാളമായി പിന്നെ ശൂന്യമായി
ഒരു വിരഹബീജമവശേഷിപ്പിച്ച്
അവളും അവനും
ഇരുട്ടിനെ വകഞ്ഞുമാറ്റി
പകലിലലിയുന്നു...

നിരോഷയാണിതും പറഞ്ഞത്;
പൂര്‍ണമായി സ്വന്തമാക്കി നഷ്ടപ്പെട്ടാലും
യഥാര്‍ത്ഥസ്‌നേഹം
ഒരു മുളന്തണ്ടായി മൂളിക്കൊണ്ടിരിക്കുമെന്ന്...
ഹൃദയമിടിപ്പിന്റെ അവസാനതാളം നിലക്കും വരെ
അത് മുരണ്ട് മുരണ്ട് ശബ്ദമുണ്ടാക്കുമെന്ന്....